被遺忘的舞台

何明華會督銀禧中學
中一
鍾曉揚

被遺忘的舞台
觀眾位置:於劇場後面的凳子就坐
舞台的定向:劇場前面的台上
人物:一心(妹妹),念慈(姐姐),爸爸,媽媽

一心(成年):hello大家好啊!我係一心啊!唔知道大家細個有咩夢想?我細個呢就想同家姐一齊做舞蹈員。我哋細嗰陣仲攞過好多跳舞獎添!
(畫面轉返去細個嗰陣)
場景:睡房
燈光:開晒
一心:家姐,今日行街我真係覺得開心,每次行街見到啲跳舞嘅衫呢,我就諗起喺舞台上跳舞嘅舞蹈員,跟住幻想自己就喺台上跳舞。真係諗到心就開心到飛起。
念慈:我都係啊,同埋喺學校參加舞蹈學會課外活動嗰陣,我真係開心到好似一隻蝴蝶咁飛舞添!唉,如果我哋大個嗰陣真係做到舞蹈員,你覺得爸爸媽媽仲會唔會好似而家咁對我哋?
(突然爸爸媽媽入嚟)
媽媽:你哋係度做咩啊,十一點幾哋功課都仲未做晒,知唔知晏晝你哋班主任又打電話過嚟同我講你哋哩排又成日欠交功課啊?同埋啊,補習老師打電話過嚟同我講你哋今日又冇去補習啊,你哋係咪又去咗行街啊?
阿爸:有冇搞錯啊你哋,就嚟考試仲去行街?快啲做完功課訓覺,聽日六點鐘起身溫書!
(爸爸媽媽閂門)
燈光:微弱
一心:唉,仲話大個嗰陣做到舞蹈員喎,可以再去睇跳舞衫都唔知有冇可能⋯⋯
念慈:唉阿妹,我哋都係放棄罷啦⋯⋯快啲做晒功課,聽日仲要六點起身啊。
(黑幕)
一心(中學):就咁樣日日六點起身溫書、放學即刻去補習同晚晚係媽咪嘅監督之下溫書,日復日,夜復夜,我同家姐最後都入到同一間全區第一嘅中學。但係,咁樣並非代表噩夢結束,並非代表我們終於可以再重拾跳舞哩樣嘢。咁樣代表嘅係噩夢嘅開始,火焰的滅絕⋯⋯
(畫面轉到中一選課外活動時)
念慈:阿妹啊,你揀咗咩活動啊?
一心:梗係跳舞學會嘅活動啦?
念慈:我都係啊,我哋一陣一齊去搵媽咪簽名囉?
一心:好!
(念慈一心走到媽媽面前請求簽名)
媽媽:參加乜嘢舞蹈學會啊?知唔知你哋而家最重要係考好dse啊?唔畀去參加任何活動!
爸爸:我已經幫你哋報好左補習班喇,禮拜一到禮拜五晏晝到夜晚七點,禮拜六日朝早九點到夜晚七點!唔準唔去!唔去就唔好返屋企!
燈光:熄晒
一心(成年):就咁樣,我同家姐日日都困在噩夢之中,最後我哋都擺到7科5**。我讀完大學之後做咗會計師,家姐做咗醫生。我哋而家都好富有,仲買咗層樓俾阿爸阿媽住。但係,其實我哋努力讀書到而家做嘢咁耐,為嘅係啲咩?
(一心同念慈(一號,成年)在舞台中央跳舞(充滿笑容),另一個一心同念慈(二號,成年)在舞台下邊緣工作(垂頭喪氣))
(一號有燈照著,二號沒有)
一心:希望大家睇完今日嘅戲劇可以明白到金錢不代表一切,做自己鍾意嘅嘢先係最重要!
燈光:開晒
-劇終-

評語:

作者對舞台的語言有所認識,透過舞台上的燈效及效果說故事。故事情節方面可試打破慣例,嘗試做到「情理之內,意料之外」,令觀眾不會那麼快就估計到故事的結局。角色人物性格設計可再下功夫,希望透過角色對白之間更認識到故事人物中的性格,令他們更立體。

評審人:林珍真

名銜:編劇、導演、演員