時間：黃昏
人物：妹妹、小芳、小芬、司儀、老師
地點：黑盒劇場
事件：妹妹為才藝表演落力練習
問題：「掉進」小芳小芬設計的陷阱，沒法表演
角色動機：妹妹想得到舞台但最後失敗
觀眾位置：四面方向
舞台定向：1）只有一個舞台 2）分兩半進行，有兩個舞台

（第一幕）

（播着舞曲）

旁白：為準備一年一度嘅才藝表演，舞蹈學會成員好努力咁練習同綵排，伴隨輕柔嘅舞曲喺舞台上翩翩起舞。

（舞曲音量越播越細至完結，綵排完畢）

老師：（走上台中，一邊拍手一邊自豪地說）喺呢個月為才藝表演嘅排練入面，你哋每個人嘅努力都令我好欣慰。因應校長嘅請求，除咗團體出演外，我會喺你哋當中再揀一位成員單獨solo。透過呢幾個月嘅觀察，我覺得妹妹好適合嘗試一下，請問你意下如何？

妹妹：（難以置信地瞪大雙眼，指着自己）我？真係㗎？好呀好呀！

老師：大家俾啲掌聲鼓勵佢啦，妹妹你要好好努力呀！

（全場拍手）
（小芳同小芬喺一旁用妒忌嘅眼神凝視住妹妹）
（眾人陸續離去，留下妹妹、小芳、小芬三人）

妹妹：（獨自練習舞蹈）我一定唔可以令老師嘉賓失望嘅，為自己加油！

（小芳同小芬走近妹妹）

小芳：（不屑語氣）嘖，加咩油呀，睇死你都做唔到㗎喇，漏油啦你。

小芬：（態度惡劣）俾老師揀中又點呀？橫掂到最後都唔會係你出去表演㗎啦，你留返啲力做個小角色咪算囉，反正都唔會有人記得起你㗎啦！

妹妹：（嬲）你咁講咩意思呀，我就知道硬係有啲人唔抵得其他人可以solo喺度串串共，都費時理咁多。

小芬：（奸笑，細聲細語）哈，到時你咪知囉。

（小芬小芳離場）

妹妹：（睇住小芬小芳離去嘅背影，唔忿氣）哼我係唔會俾你哋影響，睇住嚟。

（妹妹離場，燈光漸漸熄滅）

（第二幕：場地分開兩半）

（時鐘指正下午六時，鐘聲響起，燈光映照一半舞台）

司儀：話咁快就嚟到一年一度嘅才藝表演，喺各項節目開始前，我哋有幸邀請到舞蹈學會嘅妹妹表演韓國流行舞蹈，有請妹妹。

（妹妹自信地入場）
（妹妹鞠躬，音樂響起至完成舞蹈，觀眾靜止下來，沒有任何動作）

妹妹：（疑惑）發生咗咩事，點解啲人郁都唔郁，仲有點解老師都唔見咗嘅？（遊走黑盒劇場四面，發現老師同其他成員都唔見晒，驚慌）有冇人喺度呀救命呀！

（環境依然寂靜無聲，妹妹向觀眾揮手，仍然得唔到回應）

妹妹：（驚慌）點解會咁㗎，啲人一係唔郁一係唔見，（望時鐘）明明時鐘仲跳動緊，但周圍事物好似靜止咗咁，唔通呢一切都係假嘅？才藝表演根本未開始？

（妹妹身處嘅一半舞台燈光暗淡）

（此時時鐘指正下午六時十五分，鐘聲響起，另一半黑盒劇場燈光亮起）

司儀：話咁快就嚟到一年一度嘅才藝表演，喺各項節目開始前，我哋有幸邀請到舞蹈學會嘅小芳表演韓國流行舞蹈，有請小芳。

（小芳自信地入場，鞠躬，音樂響起，開始跳舞）

（妹妹喺台中望住另一半舞台，想走過去但失敗，彷彿有屏障分隔兩個舞台）

妹妹：（大叫）小芳！老師！點解我過唔到嚟嘅發生咩事呀？

（另一半舞台嘅人照常做表演，冇回應妹妹）

妹妹：（驚慌）點解咁嘅？點解變咗小芳做表演㗎？佢哋好似完全唔記得咗我咁⋯⋯（思考）兩個同樣嘅場地、佢哋對我嘅零反應，唔通我跌入咗第二個時空？

妹妹：（突然醒起）之前小芬小芳話唔會有人記得自己，做表演嘅都唔會係我，唔通呢一切都係佢哋喺背後嘅把戲？（眼睛泛紅，欲哭無淚）我咁辛苦嘅綵排同練習點解可以就咁俾人拋棄、俾人遺忘我嘅努力同呢個本應屬於我嘅舞台⋯⋯

（妹妹突然見到地板角落呈紅色，走去睇）

妹妹：（用手觸摸地板）點解呢度紅咗一遍，咦有個機關喎。

（妹妹關掉機關，舞台起「咔嚓」聲效，「屏障」消失）

老師：（驚覺妹妹嘅出現）你去咗邊，點解無啦啦出現喺度嘅，知唔知我周圍搵你，好似消失咗咁唔見人，最後我唯有搵小芳去表演喇。你快啲準備等陣嘅團演啦。（離場）

（妹妹發現小芬小芳喺度笑，得知佢哋就係幕後主腦）

小芳：（嘲笑）哈，都話最後做表演嗰個一定唔係你㗎啦，咁想show off，而家唔係你表演冇人知你係邊個㗎喇哈哈！

小芬：（得戚，望住小芳）我係咪好聰明呢，只係上網查下啲屏障點整同廣播之前老師錄定咗嘅司儀稿就呃到呢個𡃁妹氹氹轉。

妹妹：（震怒）點解你哋要咁做。

小芳：（高傲）你跳舞跳得咁樣衰，樣又唔靚，憑咩俾你自己solo？都唔知點解老師咁睇得起你。走啦小芬，費時同啲無聊人喺度嘈。

（小芳小芬離場，燈光映照妹妹）

妹妹：（委屈）好唔容易先俾老師揀選出嚟solo，只係想藉呢個舞台去享受跳舞啫，點解⋯⋯點解要抹殺我嘅努力。我嘅舞台未存在過，唔通已經要被人遺忘？